Los Collacios, un pasin palantre...

      ... Pues si esi pasion nun ye otru que l’organizar un rallye de clásicos, dalgo que teníemos na mollera y qu’al final pudimos facer.

      Ye pal 19 de xunu y llámase I Rallye de San Xuan, que ye puntuable pal Campeonatu d’Asturies de Regularidá, con un percorríu que pasa per munchos conceyos: Siero, Llanera, Llangréu, Tameza, Bimenes, Sariegu, Nava, Mieres, Teberga, Grau, y sobre too pela parroquia de Valdesoto, con salida y llegada a la plaza del Ayuntamientu de La Pola y con xinta y cena en Santa Marina.

En fin, un rallye pa repetir, y asina va ser a pesar que nós nun pudemos participar, pero ye perguapo facer coses con una filosofía de competición prestosa y fomentando darréu la pasión y el placer de competir con estes xoyes de coches en combinación con un gran espíritu deportivu.

      Asina ta’l presente de la escudería, que nun ye otru que dir cumpliendo los oxetivos que marquemos cuando creamos el Club Collacios del Clásicu; ye por eso que tamos percontentos de que too vaya saliendo como yera d’esperar y por eso gustaríanos dar les gracies a tolos collaboradores y collacios que, d’una manera o d’otra, echaron un gabitu pa qu’esto saliere perbién, MUNCHES GRACIES.

      Agora vienen los palos, nel tema de la competición nun tamos pa tirar volaores. El branu de 2009 foi del too variopintu. Nel Rallye d’Asturies, los dos coches tuvimos una actuación muy respetable ya que de 160 coches, clasifiquémonos dientro de los 40 primeros, y viendo la calidá de los equipos que participaben, ye como si tuviéremos ganao’l rallye.

      Nel Rallye Puebla de Sierra, uffff, el Rallye Puebla de Sierra nun foi del too “San Feliz”. Nesti rallye David y Josucu clasificáronse en tercer posición, y Salva y Juaqui depués de dir ente los 4 primeros tol rallye, a falta de 5 km p’acabar... na, nun metamos el deu na firida, quedaron 8º; los ganadores fueron unos collacios nuestros: Diego y Cris.

      Nesti rallye quedemos campeones por escuderíes, primer troféu pa la escudería, y claro, hubo celebración.

       En noviembre fuimos pa Pravia con unes ganes de ganar mui grandes, pero por una cosa o por otra nun pudimos nin acercanos al podiu, pero eso sí, quedemos terceros por escuderíes, segundu troféu pa la escudería, y, claro, tamién hubo celebración.

      Y asina de celebración en celebración, van pasando los meses y los rallyes y en momentu que tamos escribiendo estes llinies tamos embarcaos en plena competición, yá dende mayu hasta noviembre nun vamos a parar de competir, asina qu’esperemos que pal próximu escritu tengamos novedaes y que sían perbones, polo menos que nos tengamos divertío muncho peles carreteres d’Asturies.

Un saludu,

Esc. Collacios del Clásicu